Oral qalasynda «7-20-25» baǵdarlamasy boıynsha alǵashqy nesıe berildi.
– «Árbir otbasyna baspana alýdyń jańa múmkindikterin berý» bastamasyn iske asyrý sheńberinde Qazaqstan Ulttyq banki «7-20-25» jańa ıpotekalyq baǵdarlamasyn bekitip, «Baspana» arnaıy uıymyn qurǵan bolatyn. Halyqtyń jaǵdaıyn jaqsartýdy kózdeıtin baǵdarlama boıynsha ıpotekanyń jyldyq mólsherlemesi 7 paıyz bolsa, bastapqy jarna nesıege alynatyn úı qunynyń 20 paıyz mólsherinde, sondaı-aq nesıe merzimi 25 jylǵa deıin eseptelgen. Atalmysh baǵdarlamaǵa baspanasy jáne basqa da ıpotekalyq qaryzdary joq qazaqstandyqtar qatysa alady. Sondaı-aq baǵdarlamaǵa qatysýshynyń turaqty rastalǵan kirisi bolýy qajet. Turǵyn úı satyp alý úshin Astana, Almaty, Aqtaý jáne Atyraý qalalary úshin páter baǵasynyń eń joǵarǵy shegi 25 mıllıon teńge bolsa, qalǵan óńirlerge 15 mln. teńge dep belgilengen. Al ıpotekalyq qaryzdar tek ulttyq valútamen beriledi. Nysanaly ındıkatorlarǵa sáıkes ıpotekalyq kredıtterdiń jalpy kólemi 1 trıllıon teńgeni quraıdy. Kúni búgin «Sentrkredıt» banki, «Eýrazıalyq» bank, «ATF» bank, «Sesnabank», «Halyq» banki, «RBK» bank jáne «Qazaqstannyń turǵyn úı qurylys jınaq banki» «7-20-25» baǵdarlamasyna qosylǵan. Jyl sońyna deıin «Sberbank» pen «Forte» bank te qosylmaq. Bul bankter ıpotekalyq kredıtterdi atalmysh baǵdarlamanyń talaptaryna saı berip, «Baspana» arnaıy uıymy nesıelerdi satyp alady, – dedi QR Ulttyq banki BQO fılıalynyń dırektory Qozybaq Ábýuly.
Baǵdarlamaǵa qatysatyn tulǵa qaryz alýshy bankke eńbek nemese kásipkerlik qyzmetten kirisiniń bolýyn rastaıtyn qujattardy, ıpotekalyq turǵyn úı qaryzdary boıynsha ótelmegen beresheginiń bolmaýy týraly málimetti, turǵyn úıiniń joqtyǵyn rastaıtyn anyqtama, satyp alatyn turǵyn úı qujattaryn jáne táýelsiz baǵalaýshynyń baǵasyn usynýy tıis.
Qozybaq Ábýuly aıtyp ótkendeı, baǵdarlamaǵa qatysty barlyq aqparatty www.baspana72025.kz saıtynan alýǵa bolady. Sondaı-aq +7(727) 227-20-25 tegin nómiri boıynsha coll-ortalyq táýlik boıy jumys jasaıdy. Al qazir baǵdarlamanyń mobıldi qosymshasy ázirlenýde.
